සාමය සතුටපිරි සුභ නත්තලක් හා සුභ අලුත් අවුරුද්දක් වේවා!

ඊක්වල් ග්‍රවුන්ඩ් වන අප ඔබ සියලුම දෙනාට සාමකාමී හා ප්‍රීතිමත් නිවාඩු වකවානුවක් වේවායි ප්‍රර්ථනා කරමු!

ශ්‍රී ලංකාව තුල LGBTIQ ප්‍රජාව කෙරෙහි නිදහස, යුක්තිය හා සමානාත්මතාවය උදෙසා නන් අයුරින් සහයෝගය ලබාදුන් සැමට ස්ත්තුති වන්ත වීමට මෙය අවස්ථාවක් කරගැනීමට කැමැත්තෙන් පසුවෙමු. මන්ද අපට මුල්‍යාධාර ලබාදීම මෙන්ම හිතමිත්‍රාදීන් හා ප්‍රජාවේ සමාජිකයින්ගේ සහයෝගය නැතිව අපගේ කර්තව්‍යන් සාර්ථකව කරගෙන ඉදිරියට යාම අපහසු වන බැවින් ඔබ සැම ලබාදුන් සහයෝගය වෙනුවෙන් අප ඉතා කෘතඥ පුර්වක වෙමු.

මෙම 2018, සාර්ථක අංග වලින් හෙබි වසරක් ලෙස හැදින්විය හැක. එනම්, ගිය වසරයන්ට සාපේක්ෂව මෙවරත් ‘කොලඹ අභිමානය’ නියමිත දිනයන්හි පැවැත්වූ අතර මෙවර විශේෂාංගයක් ලෙස යුරෝපානු කොමිසමේ (ශ්‍රී ලංකා හා මාලදිවයින) සහයෝගය ඇතිව ‘අභිමානී සිනමා උළෙල’ අති උත්කර්ෂවත් අන්දමින් පැවැත්විය. දින 4ක් මුළුල්ලෙහි සිනමාවන්, යුරෝපයට පමණක් සිමා නොවූ ටොන්ගා, තායිවාන්, ඕස්ට්‍රේලියානු හා ඉන්දියානු සම්භවයක් සහිත චිත්‍රපටි මෙහි තිරගත විය. මේ සදහා වාර්තාගත බිදහෙලමින් ප්‍රේක්ෂකයින් සහාභාගී වූ අතර අප මේ සදහා විශේෂ ස්ත්තුතිය යුරෝපානු කොමිසමේ (ශ්‍රී ලංකා හා මාලදිවයින) නියෝජිතයින් වෙත පුද කිරීමට බලාපොරොත්තු වෙමු.

එමෙන්ම, 2018 අප්‍රේල් මස ලන්ඩන්හි පැවැත්වුණු පොදු රාජ්‍ය මණ්ඩලීය සමුළුව තුල අප විධායක අධ්‍යක්ෂිකා සදහා පොදු රාජ්‍ය මණ්ඩලීය සමානාත්මතාවය සදහා වූ ජාලය තුල අසුනක් හිමි වීම LGBTIQ ප්‍රජාවෙහි උන්නතිය උදෙසා ක්‍රියාකරන සංවිධානයක් වශයෙන් අප ලද මහත් භාග්‍යක් ලෙස සලකමු. මන්ද එහිදී අප විධායක අධ්‍යක්ෂිකා වර්තමානය තුල ශ්‍රී ලංකාවේ සමාජ සන්දර්භය තුල LGBTIQ ප්‍රජාව මුහුණ දෙන ගැටළු මෙන්ම පවතින තත්වයන් පාරදෘශ්‍ය භාවයකින් යුතුව තම හඩින් ඉදිරිපත් කරන ලදී. අපගේ සාකච්ජාවන් තුල බ්‍රිතාන්‍ය අගමැතිනි ප්‍රකාශ කලේ, “සමරිසි භාවය සදහා වූ ආන්ථිකරණ නිතින් ලෝකය වසා පැතිරවූ රට බ්‍රිතාන්‍ය වන බව මම දනිමි. එසේ කිරීම වැරදි මෙන්ම ඒ පිළිබද නොසලකා සිටීම ද වැරදිය.” එමෙන්ම අගමැතිනියගේ අදහස වුයේ, “මා ගැඹුරින්ම කනගාටු වන්නේ මෙම නීතීන් හදුන්වාදීම තුලින් සිදුවුයේ අද වනතෙක් ආන්ථිකරණය මෙන්ම ප්‍රචණ්ඩත්වයහි දිගුවක් බවයි.” ට්‍රිනිට්‍රැඩ් ටොබැගෝ හා ඉන්දියාව 2018 වසර තුල නිර්-අපරාධකරණිය කරගැනීම සිදුවිය.

2018 වසර අවසන් විමට මාස දෙකක් තිබියදී ඔක්තෝබර් අවසානයේ සිදුවූ දේශපාලන හා ව්‍යවස්ථාමය පෙරළියත් සමග ජනාධිපතිගේ සමරිසි භීතිකාව හේතුවෙන් විවිධ අනන්‍යතාවයෙන් යුත් ලිංගික ප්‍රජාව ඉලක්ක කරගනිමින් සිදුකරනු ලැබූ ප්‍රකාශයත් සමග ගිලිහුණු යහපාලන රජය නැවත කරලියට ගෙන සියලුම මානවයින්ට ගරුත්වයෙන් හා සාමකාමිව ජිවත් වීමට ඇති අයිතිය ස්ථාපිත කිරීම උදෙසා ‘ප්‍රජාතන්ත්‍රවාදය සදහා සමනල්ලු’ නමින් උද්ඝෝෂණයක් LGBTIQ ප්‍රජාවෙහි උන්නතිය උදෙසා වැඩකරන සියලුම සංවිධාන හා ප්‍රජාවේ සමාජිකයින් මුලිකත්වය යටතේ සංවිධානය විය. ඊක්වල් ග්‍රවුන්ඩ් වන අප සංවිධානයද මෙහිදී අභිමානයෙන් යුතුව උද්ගෝෂණයට සහභාගී වීමෙන් මෙන්ම සංවිධානය කිරීමෙහි කටයුතු සදහාද සහභාගී විය. එමෙන්ම බැනර් නිර්මාණය කිරීම, පුවරු නිර්මාණය කිරීම ඇතුළු නන් අයුරින් සහයෝගය ලබාදුන් සැමට ස්ත්තුති වන්ත වීමට මෙය අවස්ථාවක් කරගැනීමට අදහස් කරමු. සැබවින්ම මෙම ක්‍රියාවලිය තුලින් පිලිඹිබු වන්නේ ‘අභිමානී පාගමනක්’ (PRIDE March) වුවද පැවැත්විය හැකි බවයි.

සාමය සතුටපිරි සුභ නත්තලක් හා සුභ අලුත් අවුරුද්දක් වේවා!

Continue reading this…

ප්‍රජාතන්ත්‍රවාදය උදෙසා සමනල්ලු

මාධ්‍ය නිවේදනය : 2018, දෙසැම්බර් 07, කොලඹ, ශ්‍රී ලංකාව

ප්‍රජාතන්ත්‍රවාදය උදෙසා සමනල්ලු හිතමිත්‍රාදීන් එක්ව වර්තමානයේ ප්‍රජාතන්ත්‍රවාදය පසෙකලා පවතින වාතාවරණය හේතුවෙන් සැමට සමානව ප්‍රජාතන්ත්‍රවාදය, ආත්ම ගරුත්වය සහ ගෞරවයට ඇති අයිතිය දිනාගැනීම උදෙසා දෙසැම්බර් 07 වන සිකුරාදා, ප.ව. 4.00 – 6.00 දක්වා කොලඹ ලිප්ටන් වටරවුම අභියස සැවොම එකට රැස්විමට සුදානම් කර තිබේ.

1883 බ්‍රිතාන්‍ය යටත්විජිතවාදීන් යටතේ සමරිසි භාවය අපරාධයක් ලෙස හැදින්වූ දා සිට අද දකවා වසර 135ක් ගෙවී යන අවස්ථාවක, ශ්‍රී ලංකාව අභිමානවත්ව 70 වෙනි නිදහස සමරන මොහොතක ද තවමත් ශ්‍රී ලංකාව තුල LGBTIQA ප්‍රජාව වෙනස් කොට සැලකීම හා ආන්ථිකරණයට ලක් කිරීම බහුලව දැකිය හැකි කරුණක් වේ. මේ වන විට එක්සත් රාජධානිය ඇතුලු පොදු රාජ්‍ය මණ්ඩලයට අයත් රටවල් 35ක් සමරිසි භාවය නිර් අපරාධකරණිය කරගෙන යමින් සිටින අතර මෑතකදී ලත් හොදම නිදසුන ලෙස අසල්වැසි ඉන්දියාව ද නිර් අපරාධකරණිය කිරීමත් සමග ශ්‍රී ලංකාව තවමත් මන්දගාමී ස්වරුපයක් ගන්නේ ඇයිද යන්න ගැටලුව පැන නැගී ඇත.

මේ වන තෙක් ශ්‍රී ලාංකීය දේශපාලකයින් LGBTIQA ප්‍රජාව අසහනකාරයින් හෝ ලෙඩ්ඩුන් යනුවෙන් නිරන්තරයෙන් නිගරු කරමින් ජන්ද ලබාගැනීමට උත්සහා කිරීම බහුලව දක්නට ලැබුවද අවධාරනය කල යුතු වන්නේ විද්‍යාත්මකව හෝ වෛද්‍ය විද්‍යාත්මකව මේ පිළිබද සනාථ කොට නොමැත.
අප ලිප්ටන් වටරවුම වෙත රැස්ව අතිගරු ජනාධිපති හා ඇතුළු මැති ඇමතිවරුන්ට අවධාරණය කිරීමට බලාපොරොත්තු වන්නේ, ඔබලා පාලනයට ගෙන එම උදෙසා මහගු දායකත්වයක් දරු සමාජයේ LGBTIQA ප්‍රජාව වන අප විශාල ජන්දදායක කොටසක් බවයි. එමෙන්ම ප්‍රජාතාන්ත්‍රික රටක ව්‍යවස්ථාවට පටහැනිව ගොස් කටයුතු කිරීම ඇතුළු ශ්‍රී ලාංකික පුරවැසියන් ලෙස සැමට සමාන ප්‍රජාතන්ත්‍රවාදය, ආත්ම ගරුත්වය සහ ගෞරවයට ඇති අයිතිය ස්ථාපිත කිරීම උදෙසා කටයුතු කරන මෙන් ඉල්ලා සිටීම මෙහි අරමුණු වේ. උද්ගත වී ඇති තත්වය තුල අප විවිධ කණ්ඩායම් සමග එක්ව නැගී සිටින මොහොතක මෙම උද්ගෝෂණය උදෙසා ද සහභාගී වන ලෙසට ආරාධනා කරන්නෙමු.

#butterfliesfordemocracy

Continue reading this…

Find peace of mind: free counseling service for LGBTIQ persons

LEARN MORE

අපි ප්‍රජාතන්ත්‍රවාදය උදෙසා සමනළයෝ වන්නෙමු

අපේම ඡන්දයෙන් පත් වූ, මේ රටේ ජනමතය පාවා දුන්, රටේ ‘පළමු පුරවැසියා’ විසින් තමන්ගේ නැති වී යන ජනප්‍රියත්වය රැක ගත හැකි යැයි සිතා, තමන් කරන ප්‍රජාතන්ත්‍ර විරෝධී වැඩ සාධාරණීකරණය කළ හැකි යැයි සිතා ලිංගික දිශානතිය ඉලක්ක කර ගෙන දේශපාලන විරුද්ධවාදීන්ට සහ පොදුවේ ලාංකීය සමකාමී ප්‍රජාවට රිදවීමේ සහ අපහාස කිරීමේ අරමුණෙන් සමනළයා යන වචනය භාවිතා කර තිබේ. එයට විරෝධය පළ කිරීමක් ලෙස ද, අඛණ්ඩව සිවිල් සමාජ ක්‍රියාකාරීන් විසින් සිදු කළ මෙම විරෝධතාවයට සහයෝගයක් පළ කිරීමක් ලෙස ද අපි අද මෙතැනට පැමිණ සිට ගනිමු.

ඔහුගේ සමනළ කතාවෙන් අපට රිදුනේ නැත. අපි තවත් ශක්තිමත් වූයෙමු. සමනළයා කියන්නේ සමාජ වෙනස, බලාපොරොත්තුව සහ ජීවිතය ගැන මෙන්ම, විවිධත්වයේ ද සංකේතයකි. එහෙත් ඔහු ප්‍රමුඛ ‘වත්මන් රජයේ’ අනෙකුත් දේශපාලනඥයන් විසින් ප්‍රජාතන්ත්‍රවාදයේ වටිනාකම් පාවා දීම ගැන අපට රිදී ඇත. මහජන ඡන්දයෙන් පත් වූ දේශපාලනඥයෝ කෝටි ගණන්වල ලන්සුවලට විකිණෙන වෙළෙඳ භාණ්ඩ වී තිබීම ගැන අපට රිදී ඇත.

මානව හිමිකම් අමු අමුවේ උල්ලංඝණය කරමින්, මාධ්‍යවේදීන්ට, සමාජ ක්‍රියාකාරීන්ට පහර දෙමින්, ඇතැම් අය මරා දමමින්, නීතිය සහ ප්‍රජාතන්ත්‍රවාදය අමුඅමුවේ උල්ලංඝණය කළ පසුගිය රජය පරාජය කිරීමට අපි බොහෝ දෙනෙක් ඔහුට 2015 වසරේ දී සහයෝගය දුන්නෙමු. ඔහු කෙරේ අප විසින් තැබූ විශ්වාසය පාවා දෙමින්, මහජන ඡන්දයෙන් පරාජය කරන ලද පසුගිය රජයේ ප්‍රජාතන්ත්‍ර විරෝධී එම පාලකයන් සමගම නැවත අත්වැල් බැඳ ගෙන කුමන්ත්‍රණකාරී ලෙස බලය අල්ලා ගැනීමේ ඒ පිළිකුල් සහගත ක්‍රියාව අපි තරයේ හෙළා දකිමු.

ඔහු සිදු කළ පාවාදීම වසා ගැනීමට සමලිංගිකභීතිකාව ආවුදයක් ලෙස භාවිතා නොකරන ලෙසත්, ශ්‍රී ලාංකීය සමකාමී ප්‍රජාවට අභිමානයෙන්, ගෞරවයෙන්, සහ නීතියේ සහ යුක්තියේ සමානත්මතාවය සහිතව ජීවත් වීමට ඉඩ සැලසීමට ඔහු ඇතුළු සියලු දේශපාලන පක්ෂ සහ ජනතා නියෝජිතයන් විසින් කටයුතු කළ යුතු බව අපි තරයේ මතක් කරමු.

ඒ අතරම වර්තමානයේ සිදු වෙමින් පවතින ඒක පාර්ශ්වික මාධ්‍ය වාර්තාකරණය සහ ජනමාධ්‍ය වෙත කරන ලද දේශපාලන ඇඟිලි ගැසීම් දැඩි පිළිකුළෙන් යුතුව අපි තරයේ හෙළා දකිමු. මාධ්‍ය නිදහස යනු ප්‍රජාතන්ත්‍රවාදයේ අත්තිවාරම වන්නේය.

සමලිංගිකභීතිකාව යනු බ්‍රිතාන්‍යයන් විසින් හඳුන්වා දෙන වික්ටෝරියානු සදාචාරයෙන් උපදින අධිරාජ්‍යවාදී උරුමයකි. අදට නිදහස ලබා වසර 70ක් ගත වී ඇත. එදා බ්‍රිතාන්‍ය පාලකයන් විසින් ඉටු කළ කොන්ත්‍රාත්තුව අද ඔහු වැනි අපේම දේශපාලනඥයෝ අපට එරෙහිව සිදු කර ගෙන යති. අප පමණක් නොව සියලු සුළුතර ජන කොටස්වල අයිතීන් බිල්ලට දී, ජාතිවාදය, ආගම්වාදය, වාර්ගික ගැටුම් වපුරා, ප්‍රජාතන්ත්‍රවිරෝධී ලෙස බලය රැක ගත හැකි යැයි ඔවුහු විශ්වාස කරන්නේ නම් එය බරපතල වැරදීමක් වන්නේය.

මේ සිදුවෙමින් පවතින ප්‍රජාතන්ත්‍රවිරෝධී බලලෝභී කුමන්ත්‍රණය ‘සමනළ’ ප්‍රජාව ලෙස අපි තරයේ හෙළා දකිමු. මිනිස් අයිතිවාසිකම් සුරක්ෂිත වන්නේ ප්‍රජාතන්ත්‍රවාදී සමාජයක බැව් අපේ විශ්වාසයයි. එය සුරක්ෂිත කිරීම වෙනුවෙන් අපි ‘සමනළයෝ’ අඛණ්ඩව සටන් කරන්නෙමු. ප්‍රචණ්ඩත්වයේ කුරිරු කුළු ගෙඩි පහරට වඩා, සාධාරණත්වය, සාමය, ගරුත්වය වෙනුවෙන් නැගෙන සමනළ තටු හඬින්ද ලෝකය වෙනස් කළ හැකිය. ඒ නිසා අපි ප්‍රජාතන්ත්‍රවාදය උදෙසා සමනළයෝ වන්නෙමු. අපට කරන සෑම අපහාසයක්ම, පහර දීමක්ම එකී අරගලය වෙනුවෙන් අපට කරන දිරිමත් කිරීමක්ම වන්නේය.

ප්‍රජාතන්ත්‍රවාදය වෙනුවෙන් සමනළයෝ

2018 නොවැ 07
ලිබර්ටි වටරවුම, කොළඹ

Continue reading this…

“සමාන බව සිතීමේ” නාමයෙන් පෙර පාසල් දරුවන්ට සමලිංගිකත්වය ඉගැන්වීමේ ව්‍යාපෘතියක් යනුවෙන් 2018.03.27 වන දින මාධ්‍ය සාකච්ඡාවකදී මහාචාර්ය ඉඳුරාගාරේ ධම්මරතන හිමි දැක්වූ අදහස්වලට ප්‍රතිචාර දැක්වීම

30-03-2018

මහාචාර්ය ඉඳුරාගාරේ ධම්මරතන හිමි
සභානායක,
මහජන රාජ්‍ය සභාව,
544/ඒ,
නාවල පාර,
රාජගිරිය.

ගරු කටයුතු ස්වාමීන් වහන්ස,

“සමාන බව සිතීමේ” නාමයෙන් පෙර පාසල් දරුවන්ට සමලිංගිකත්වය ඉගැන්වීමේ ව්‍යාපෘතියක් යනුවෙන් 2018.03.27 වන දින මාධ්‍ය සාකච්ඡාවකදී ඔබවහන්සේ දැක්වූ අදහස්වලට ප්‍රතිචාර දැක්වීම.

ඊක්වල් ග්‍රවුන්ඩ් ආයතනය යනු ශ්‍රී ලංකාවේ ජීවත්වන සමරිසි, ද්විරිසි, සංක්‍රාන්ති සමාජභාවීය, අන්තර් ලිංගික හා තම ලිංගික අනන්‍යතාවය හා ස්ත්‍රී පුරුෂ සමාජභාවීය අනන්‍යතාවය ප්‍රශ්නභාවී ප්‍රජාවගේ (LGBTIQ) සමාජයීය, දේශපාලනික හා සංස්කෘතික අයිතිවාසිකම් වෙනුවෙන් කටයුතු කරන සංවිධානයකි. ඊක්වල් ග්‍රවුන්ඩ් ආයතනයේ මූලිකම අරමුණ ශ්‍රී ලංකාවේ ජීවත්වන සමරිසි, ද්විරිසි, සංක්‍රාන්ති සමාජභාවීය, අන්තර් ලිංගික හා තම ලිංගික අනන්‍යතාවය හා ස්ත්‍රී පුරුෂ සමාජභාවීය අනන්‍යතාවය ප්‍රශ්නභාවී ප්‍රජාවට කිසිදු ආකාරයක හිරිහැරයකින් කරදරයකින් තොරව ජීවත්වීමට අවශ්‍ය පරිසරය සකස් කර දීමයි. 1883 වර්ෂයේදී බ්‍රිතාන්‍ය යටත්විජිතවාදීන් විසින් හඳුන්වා දුන් ශ්‍රී ලංකාවේ දණ්ඩ නීති සංග්‍රහයට අනුව ඔවුන් අපරාධකරුවන් හා සමාජ අපගාමීන් ලෙස සලකන අතර අධ්‍යාපන, සෞඛ්‍ය සේවා, රැකියා, නීතිමය හා සමාජ සේවා සපයන ආයතනවලදී ඔවුන් විවිධාකාරයේ වෙනස්කොට සැලකීමට, හිරිහැරවලට ලක්කිරීමට ලක්වේ.

මේ නිසා ඔවුන්ට නිසි අධ්‍යාපන අවස්ථාවන් ලබාදීම, වෙනස්කොට සැලකීම්වලින් තොරව සෞඛ්‍ය පහසුකම් ලබාගැනීම, නීතිමය වශයෙන් සාධාරණයක් ලබාදීම, පොලිස් වධ හිංසාවලින් ආරක්ෂා කිරීම, මානසික උපදේශනය සැපයීම යනාදිය වෙනුවෙන් ඊක්වල් ග්‍රවුන්ඩ් සංවිධානය කටයුතු කරයි. ඊක්වල් ග්‍රවුන්ඩ් ආයතනය සෑමවිටම ක්‍රියාකරන්නේ රටේ නීතිය හා ව්‍යවස්ථාවට අනුකූලව වන අතර ව්‍යවස්ථාමය හෝ නීතිමය රාමුවෙන් පිටතට යන කිසිදු ආකාරයේ ක්‍රියාවකට අනුබල දෙන්නේ නැත. විශේෂයෙන් ඊක්වල් ග්‍රවුන්ඩ් ආයතනය වයස අවුරුදු 18 ට අඩු දරුවන්ට අදාළව කිසිදු ක්‍රියාකාරකමක් සිදු නොකරන අතර, එවැනි ක්‍රියාවලට කිසිදු ආකාරයක අනුබල දීමක් හෝ එවැනි ක්‍රියාවන් සිදුකරන කිසිදු සංවිධානයක් සමග අත්වැල් බැඳගන්නේ හෝ නැත. එමෙන්ම සියලුම සමරිසි මිනිසුන් යනු ළමා අපචාරකයන්ය යනුවෙන් හා සමරිසියන් වෙනුවෙන් වැඩ කරන සංවිධානවල ඉලක්කය විෂම ලිංගික දරුවන් සමරිසියන් බවට පත්කිරීම යැයි වැරදි අදහසක් සමාජ ගත වෙමින් පවතී. ඊක්වල් ග්‍රවුන්ඩ් ආයතනය හෝ අප විසින් සිදුකරනු ලබන කිසිදු වැඩසටහනක හෝ එවැනි ආකාරයේ න්‍යාය පත්‍රයක් නොමැති බව දන්වා සිටිමි. ඔබවහන්සේ විසින් සිදුකරන ලද මාධ්‍ය සාකච්ඡාවේදී පෙරපාසල් දරුවන් හා පූර්ව ළමාවිය සංවර්ධනය වෙමින් පවතින වයසේ දරුවන් ඉලක්ක කරගනිමින් තින්ක් ඊක්වල් (Think Equal) නැමැති සංවිධානය විසින් සිදුකරනු ලබන වැඩසටහනක් පිළිබඳව ප්‍රකාශ කිරීමේදී ඊක්වල් ග්‍රවුන්ඩ් ආයතනයේ නමද ඈදාගනිමින් කරුණු ප්‍රකාශ කර තිබුණි. මෙම ලිපිය මගින් අප විසින් ගෞරව පූර්වකව ඔබ වහන්සේට දන්වා සිටින්නේ තින්ක් ඊක්වල් සංවිධානය සමග ඊක්වල් ග්‍රවුන්ඩ් සංවිධානයේ කිසිදු ආකාරයක සම්බන්ධකමක් හෝ ඔවුන් විසින් සිදුකරන කිසිදු ක්‍රියාකාරකමක් පිළිබඳ අපගේ වගකීමක් නොමැති බවයි. එමෙන්ම වයස අවුරුදු 18 ට වැඩි සමරිසි, ද්විරිසි, සංක්‍රාන්ති සමාජභාවීය, අන්තර් ලිංගික හා තම ලිංගික අනන්‍යතාවය හා ස්ත්‍රී පුරුෂ සමාජභාවීය අනන්‍යතාවය ප්‍රශ්නභාවී ප්‍රජාව වෙනුවෙන් අප විසින් සිදුකරන සියලුම ආකාරයේ වැඩසටහන් පිළිබඳ විනිවිදභාවය හා වගකිම් සහගත භාවය අප විසින් භාර ගන්නා බවයි.

ඊක්වල් ග්‍රවුන්ඩ් ආයතනය විසින් සිදුකරනු ලබන මානව හිමිකම් කාර්යයන් පිළිබඳ ඕනෑම අවස්ථාවකදී පරීක්ෂා කිරීමේ හෝ ප්‍රශ්න කිරීමේ අයිතිය ශ්‍රී ලංකාවේ ඕනෑම පුරුවැසියෙකුට ලබාදිය හැකිවන අතර, මේ පිළිබඳ ඔබ වහන්සේ ඇතුළු සංඝ රත්නය හමුවී කරුණු පැහැදිලි කිරීමටද අප සූදානම් බව ගෞරව පූර්වකව දැනුම් දෙමු.

එමෙන්ම ශ්‍රී ලංකාවේ වෙසෙන සමරිසි, ද්විරිසි, සංක්‍රාන්ති සමාජභාවීය, අන්තර් ලිංගික හා තම ලිංගික අනන්‍යතාවය හා ස්ත්‍රී පුරුෂ සමාජභාවීය අනන්‍යතාවය ප්‍රශ්නභාවී ප්‍රජාව වර්තමානයේදී මුහුණපාන විවිධ ප්‍රශ්න හා ඔවුන් විසින් දෛනිකව මුහුණ දෙන විවිධ හිරිහැර යනාදිය පිළිබඳවද ඔබ වහන්සේලාගේ අවධානය යොමුකරනු කැමැත්තෙමු. මෙලෙස තම ලිංගික හෝ මානසික කැමැත්ත නිසා විවිධාකාරයේ ගැටළුවලට මුහුණපාන, ඒ නිසාම සියදිවි නසාගන්නා හෝ විවිධාකාරයේ මානසික ප්‍රශ්නවලින් හෙම්බත් වෙන, බොහෝ අවස්ථාවලදී තම උපන් මව්රට හැරදා යන ඉතා දක්ෂ හා දීප්තිමත් අනාගතයක් හිමි දහස් සංඛ්‍යාත සමරිසි, ද්විරිසි, සංක්‍රාන්ති සමාජභාවීය, අන්තර් ලිංගික හා තම ලිංගික අනන්‍යතාවය හා ස්ත්‍රී පුරුෂ සමාජභාවීය අනන්‍යතාවය ප්‍රශ්නභාවී ප්‍රජාවගෙන් බහුතරයක් සිංහල බෞද්ධ අපේම මිනිසුන් වන බවද මතක් කරනු කැමැත්තෙමු. ඔවුන් සූරාකෑමෙන්, අපයෝජනය කිරීමෙන් හා දණ්ඩනයට ලක්කිරීමෙන් වළක්වා ගැනීමේ අභියෝගයට සමාජයක් වශයෙන් අපට මුහුණ දීමට සිදුවී ඇත. වසර 14 ක පමණ කාලයක් තිස්සේ ශ්‍රී ලංකාවේ වෙසසෙන සුළුතර ලිංගික ප්‍රජාවට විවිධාකරයෙන් සේවා ලබාදීමෙන් අප විසින් ලබාගත් දැනුම, අත්දැකීම් හා ඔවුන් විසින් සමාජයෙන් ඉල්ලා සිටින්නේ මොනවාදැයි ඔබ වහන්සේලා සමග සාකච්ඡා කිරීමට අපි කැමැත්තෙමු. එමෙන්ම ඔවුන්ට එරෙහිව සිදුවන විවිධාකාරයේ හිංසන මගින් සිදුවන්නේ ශ්‍රී ලංකා ව්‍යවස්ථාවේ සඳහන් වන මූලික අයිතිවාසිකම් උල්ලංඝණය වීමකි.

අන්තර් ජාතික මනෝ විද්‍යා සංගමය, ලෝක සෞඛ්‍ය සංවිධානය යනාදී ලෝකයේ සෞඛ්‍ය සම්බන්ධ නිර්දේශ සපයන ජාත්‍යන්තර ආයතන පවා සමරිසිභාවය මානසික රෝගයක් හෝ ඇබ්බැහියක් නොව පුද්ගලයින්ගේ ජානමය හා මනස සකස්වෙන ආකාරය අනුව උපතින් තීරණය වන සාධකයක් බව පැහැදිලි කර තිබියදීත්, ඔවුන්ට එරෙහිව විවිධාකාරයේ හිංසන හා ප්‍රචණ්ඩ ක්‍රියා සිදුකිරීමත්, ඔවුන් සමාජයෙන් කොන්කිරීමට උත්සාහ කිරීමත් බෞද්ධ දර්ශනයේ මූලික ඉගැන්වීම්වලට පටහැණි වන බව අපගේ විශ්වාසයයි. ඔබ වහන්සේම ප්‍රකාශ කරන පරිදි ශ්‍රී ලාංකික සිංහල බෞද්ධයින් ලෙස අපි සියලුම සත්ත්වයින්ට කරුණාවෙන් හා මෛත්‍රියෙන් යුතුව සලකන අතර බෞද්ධයින් ලෙස සමාජ සමානත්වය හා සියලු ජාතීන්ට, සියලු වර්ගවලට, සියලු කුලවලට හා සියලු ලිංගික අනන්‍යතාවන්ගෙන් යුක්ත හා ස්ත්‍රී පුරුෂ සමාජභාවීය අනන්‍යතාවන් අයට සමානව ජීවත්වීමේ පරිසරයක වැදගත්කම ප්‍රගුණ කර ඇත්තෙමු. එහෙත් ප්‍රායෝගිකව එම තත්ත්වය එලෙසම සිදු නොවන අතර, ශ්‍රී ලංකාවේ ජීවත්වන විවිධ ලිංගික අනන්‍යතාවලින් යුතු ප්‍රජාව තමන් වෙනුවෙන් සාධාරණයක් ඉටුවෙන තුරු බලා සිටී. ඒ සඳහා ඔබ වහන්සේලාගේ නොමඳ කරුණාව හා ආශිර්වාදය අපි අපේක්ෂා කර සිටිමු.

අවසානයේ නැවත වතාවක් අප විසින් සහතික කර කියා සිටින්නේ තින්ක් ඊක්වල් සංවිධානය සමග අප සංවිධානයට කිසිදු ආකාරයක සම්බන්ධතාවයක් නොමැති අතර ඔවුන් විසින් සිදුකරන කිසිදු ආකාරයේ වැඩසටහනකට අපගේ අනුබලය නොලැබෙන බව ගෞරව පූර්වකව සඳහන් කරනු කැමැත්තෙමු. මේ පිළිබඳ ඔබ වහන්සේලා සමග ඕනෑම සාකච්ඡාවකට අපව සම්බන්ධ කරගැනීමට කරුණාකර equalground@gmail.com යන ඊමේල් ලිපිනයෙන් හෝ 0112806186 යන දුරකථන අංකයෙන් අපව සම්බන්ධ කරගන්න.

ඔබ වහන්සේලාගේ සියලු කටයුතු සාර්ථක වේවා!

ස්තූතියි.

මෙයට

විශ්වාසී,

රොසෑනා ෆ්ලේමර් කල්දේරා
විධායක අධ්‍යක්ෂිකා
ඊක්වල් ග්‍රවුන්ඩ්

Continue reading this…

ජාත්‍යන්තර කාන්තා දින සැමරුම 2018

ඔබ තරුණ ස්ත්‍රියක් වුවද, වැඩිහිටි ස්ත්‍රියක් වුවද පුරුෂාධිපත්‍යයය මගින් ඇතිකර තිබෙන අශිෂ්ටත්වය අබිබවමින් ඉදිරියට යාමට හා විෂමතාවලට එරෙහිව නැඟීසිටීම සඳහා සෑම අවස්ථාවකදීම උත්සාහ කළ යුතුය. එහිදී අද දින මෙලෙස සමරනු ලබන ජාත්‍යන්තර කාන්තා දිනය මගින් එවැනි පුරුෂාධිපත්‍ය හා විෂමතාවාදී අදහස් හා සමාජීය අගයන් මගින් ඇති බැඳීම් හා වැට කඩොළු බිඳමින් ඔවුන්ගේ බලාපොරොත්තු සඵලකරගැනීම සඳහා ඉඩ සලසාගත යුතුය.. මන්ද සුළුතර ප්‍රජාවක් ලෙස සමරිසි, ද්විරිසි හෝ සංක්‍රාන්ති සමාජභාවිය කාන්තාවන්ගේ නිහඬ බව ශ්‍රී ලංකාව තුළ දක්නට ලැබෙන නිසාවෙනි.

වෙනස්කොට සැලකීම හා අසමාන ආකාරයේ විවිධ සමාජයීය අගයන් ශ්‍රී ලංකාව තුළ කාන්තාවන් වෙත පවරා ඇත. එහිදී රටක ආර්ථිකයෙහි තත්ත්වය වර්ධනය පිළිබඳව පමණක් නොව සමාජය ගොඩනැංවිමට දායකත්වය සැපයීම පිළිබඳව තවත් සිතිය යුතුය. ඇය අපේ ආදරණිය අම්මාය, එසේම දියණිය හා සහෝදරියද වන්නී ය. තවත් විටෙක ඇය මිතුරියයි. එපමණක් නොව සෙනෙහෙබර බිරිඳ වන්නීය. වෘත්තීයෙන් ඇය වෛද්‍යවරියකි, ඉංජිනේරුවරියකි. විවිධාකාරයෙහි තනතුරු දරයි. නමුත් ඇය කාන්තාවක් ලෙස සමරිසි කාන්තාවක්, ද්විරිසි කාන්තාවක් හෝ සංක්‍රාන්ති සමාජභාවී කාන්තාවක් වීම යනු ඔවුන් සමාජ අගයන් ප්‍රතික්ෂේප කරන්නන් ලෙස නම් කරති. සමාජයෙන් ආන්තිකරණයට හා සමාජ අපකීර්තියට ලක් වුවෝ වෙති. දිනෙන් දින සමාජය විසින් ඔවුන් වෙත එල්ල කරනු ලබන මෙවැනි එදිරිවාදීකම් හමුවේ ඔවුන්ගේ දෛවය තීරණය වන්නේ අවාසනාවන්ත ආකාරයෙනි.

ජාත්‍යන්තර කාන්තා දිනය හරහා, “කාන්තාවන් නොමැති සමාජයක් අසම්පුර්ණ සමාජයක්” බව පසක් කල යුතුය. කාන්තාව සමරිසි , විෂමරිසි, සංක්‍රාන්ති සමාජභාවී හෝ ස්ත්‍රී පුරුෂ විවිධත්වය යනාදී වුවත් කිසිදු වෙනස්කමකින් තොරව ඔවුන්ගේ ජිවිත වෙනුවෙන් නැගී සිටීමේ අවශ්‍යතාව අතිශය වැදගත් කොට සැලකිය යුතුය. අප ඔවුන්ගේ සාර්ථකත්වයන් හා ජිවිත කතාවන් අගය කරමින් ඒවා බෙදාගැනීමට තරම් සංවේදී විය යුතුය. එහිදී සියලු ලිංගික දිශානතීන් ලෙස කාන්තාවන් එකට එක්ව තම අයිතීන් වෙනුවෙන් එකාවන් සේ හඬ නැගිය යුතුය.

මෙවර ජාත්‍යන්තර කාන්තා දින සැමරුම හා සමගාමිව සාර්ථක වූ කාන්තාවන් හා ඔවුන්ගේ අදහස් ඔබ සමගින් ඉතා ආඩම්බරයෙන් යුතුව අපි හුවමාරු කරගනිමු. විවිධාකාර ගැටළු හා ප්‍රශ්න හමුවේ පුරුෂාධිපත්‍ය, සමරිසි භීතිකාව හා ලිංගවාදී අදහස් තවත් පැතිකඩකින් වර්ධනය වෙත්දී ඔවුන් සැබෑ ලෙසම කාන්තා ශක්තිය පෙන්වමින් තම සාර්ථකත්වය කරා පියමන් කොට ඇත.

Continue reading this…