LGBT ප්‍රජාවට සිදුවන හිංසනයන්ට එරෙහිව නැගීසිටිමු

සමසෙනෙහස්, ද්වීසෙනෙහස්, සංක්රාන්ති සමාජභාවී, අන්තර් ලිංගික හා තම අනන්යතාවය ප්රශ්නභාවී ප්රජාව බොහෝවිට තම නෑදෑ හිත මිතුරන්ගෙන්, සමකාලීනයන්ගෙන් සහ නීතිමය බලපෑම් හේතුවෙන් මානසිකව, ශාරීරිකව සහ කායිකව හිංසන හා පීඩනයන්ට ලක්වන අතර මෙම හිංසාකාරී අවස්ථාවන් විවිධ අයුරින් සිදුවේ. ශ්රී ලංකාවේ LGBTIQ ප්රජාව සදහා නිශ්චිත ආරක්ෂාවක් නොමැති වීම හේතුවෙන් එවැනි තත්වයන් බොහෝවිට සමාජ ගැටළු ලෙස කතාවට ලක් නොවී යයි.

ඔබ හෝ ඔබ දන්නා අයෙකු ඔවුන්ගේ ස්ත්රී-පුරුෂ සමාජභාවය හෝ ලිංගික දිශානතිය මූලික කරගෙන මෙවැනි හිංසන හා පීඩාවන්ට ලක්වූ අයෙකු නම්, ඔබට අවශ්ය නීතිමය සහය, වෛද්ය සහය හෝ භාවාත්මක උපදේශන සහය ලබාදීමට අපට හැකිය.

දුරකථන අංක 0114 334277 | කෙටි පණිවුඩ/WHATSAPP – 0777677333 |
FACEBOOK

[01] බොහෝවිට සමසෙනෙහස් කාන්තාවන්ට ඔවුන්ගේ කැමැත්තකින් තොරව විවාහ වීමට බලපෑම් ඇතිවන අතර එමගින් ඔවුන්ගේ ජීවිත කාලය පුරාවටම මානසික, කායික සහ ලිංගික හිංසනයන්ට ගොදුරු වීමට සිදුවේ.

[02] ප්රිය සම්භාෂණ, ආපනශාලා වැනි නොයෙකුත් පොදු ස්ථාන වලදී තම ජීවන සහකාරිය සම`ග කාලය ගත කරන සමසෙනෙහස් කාන්තාවන්ට ඔවුන්ගේ ලිංගිකත්වය හෝ ලිංගික ප්රකාශනය හේතුවෙන් කායික හිංසනයන්ට හෝ වාචික හිංසනයන්ට ලක්වීමට සිදුවේ.

[03] පොලිස් නිලධාරීන්, යම් ප්රතිලාභ ලබාගැනීමේ අරමුණින් අත්තනෝමතික ලෙස සමසෙනෙහස් පිරිමින් අත්අඩංගුවට ගන්නා අතර එමගින් ඔවුන් ශාරීරිකව සහ මානසිකව පීඩනයට ලක් කරයි.

[04] සමසෙනෙහස් සමාජභාවයෙන් යුක්ත පිරිමින් සහ පිරිමි ළමයින් ඔවුන්ගේ ලිංගික දිශානතිය හා ලිංගික ප්රකාශනය හේතුවෙන් නෑදෑහිත මිතුරන්ගෙන් සහ සමකාලීනයන්ගෙන් ලිංගික අපයෝජනයන්ට ලක්වේ.

[05] සංක්රාන්තික කාන්තාවන්ගේ ස්ත්රී පුරුෂ සමාජභාවය හා ලිංගික ප්රකාශනය හේතුවෙන් නීතිමය බලපෑම් මත ලිංගික හිංසනයන්ට ලක්වේ.

[06] සංක්රාන්තික කාන්තාවන්ගේ ස්ත්රී පුරුෂ සමාජභාවය හා ලිංගික ප්රකාශනය හේතුවෙන් මගතොටදී වාචිකව, ශාරීරිකව හා ලිංගිකව හිංසනයන්ට ලක්වේ.

[07] එදිනෙදා ජීවිතයේ දී නීතිමය බලපෑම් මත ද, ඇතැම් වෛද්ය අංශයන් වලදී සහ රැකියා ස්ථාන වලදී ද සංක්රාන්තික පිරිමින්ට, ඔවුන්ගේ ලිංගික අවයව පිළිබදව ප්රශ්ණ කිරීමට ලක්වන අතර ඇතැම්විට ඔවුන්ගේ ලිංගික අවයව නිරාවරණය කර පෙන්වීමටද බල කරනු ලැබීම නිසා මහත් භාවාත්මක පීඩනයන්ට ලක්වේ.

[08] සංක්රාන්තික පිරිමින්ගේ ස්ත්රී පුරුෂ සමාජභාවය හා ලිංගික ප්රකාශනය හේතුවෙන් ඔවුන්ව එයින් “නිරෝගී” කරවීමට යැයි කියා නෑදෑහිත මිතුරන්ගෙන් ලිංගික හිංසනයන්ට ලක්වේ.

BREAK THE SILENCE

Continue reading this…

ශ්‍රී ලංකා මානව හිමිකම් සැලැස්ම යටතේ LGBTIQ ප්‍රජාව වෙනුවෙන් වූ අවම ආරක්ෂාව

2017 නොවැම්බර් 02 වන දින එළිදැක්වුනු ශ්‍රී ලංකාවේ මානව අයිතිවාසිකම් ආරක්ෂා කිරීම හා ප්‍රවර්ධනය සඳහා වූ ජාතික ක්‍රියාකාරී සැලැස්මට අදාළව ඊක්වල් ග්‍රවුන්ඩ් ආයතනයේ විධායක අධ්‍යක්ෂිකා රොසෑනා ෆ්ලේමර්-කල්දේරා මෙලෙස අදහස් දැක්වීය.

“මිනිසුන්ගේ ස්ත්‍රී පුරුෂ සමාජභාවයට අදාළව සිදුකෙරෙන මානව හිමිකම් උල්ලංඝණය කිරීම අවම කිරීම සඳහා සහ මානව හිමිකම් ප්‍රවර්ධනය කිරීම වෙනුවෙන් වර්තමානයේදී ලංකා රජයේ කැපවීම අප අගය කරමු.

අප විශ්වාස කරන පරිදි ශ්‍රී ලංකාවේ වෙසෙන සියලුම වැසියන්ට බියෙන්, සැකයෙන් තොරව හා හිංසනයෙන් හෝ වෙනස්කොට සැලකීම්වලට ලක්වීමෙන් තොරව ජීවත්වීමට අවශ්‍ය නිදහස් ජීවිතයක් තිබිය යුතුය. මෙහිදී අප විසින් සියලුම වැසියන් යනුවෙන් අදහස් කළේ ලිංගික දිශානතිය මත පදනම්ව සමරිසි ප්‍රජාවද ඇතුළත්වය. එහෙත් අවාසනාවකට මෙන් ජාතික ක්‍රියාකාරී සැලැස්මෙන් එය තහවුරු වී නොමැත.

අප විසින් දෛනිකව සිදුකරන්නාවූ විවිධ ව්‍යාපෘති හා ක්‍රියාකාරකම්වලින් පැහැදිලි වන යථාර්ථය නම් යම් ප්‍රජාවක් ඔවුන් ආදරය කරන්නේ කාහටද යන කරුණ මත දෛනිකව විවිධ තර්ජන හා අවදානම් යටතේ ජීවත්වන බවයි. මෙවැනි අවදානම්වලට ලක්වන ප්‍රජාවද අනෙක් වැසියන් මෙන්ම රටක මානව හිමිකම් ආරක්ෂණ යාන්ත්‍රණ යටත් ආරක්ෂා විය යුතු බව අපගේ හැඟීමයි.

මානව හිමිකම් සියල්ලන්ටම යන අර්ථයෙන් සලකා බලමින් ශ්‍රී ලංකා රජය විසින් සිදුකරගත් මෙම අතපසුවීම හෝ හිතාමතාම අතපසුකිරීම නිවරැදි කරමින් ලිංගික දිශානතිය මත පදනම්ව මිනිසුන් වෙනස්කොට සැලකීම වැළැක්වීම සඳහා අවශ්‍ය පියවර ගනු ලබනු ඇතැයි අපි විශ්වාස කරමු.”

ශ්‍රී ලංකාවේ වැසියන්ට තම මානව හිමිකම් ආරක්ෂා කිරීමට බැඳී සිටින රජයක් සම්බන්ධව හා 2017- 2021 කාලසීමාව තුළ තම මානව හිමිකම් ආරක්ෂා කිරීම පිළිබඳව ජාතික ක්‍රියාකාරී සැලැස්මක් සකස්කිරීම සම්බන්ධව අපේක්ෂා දල්වාගත හැකි ආකාරයේ ප්‍රතිපත්තීන් සමූහයක් 2017 නොවැම්බර් 02වන දින විදේශ අමාත්‍යාංශ වෙබ් අඩවිය මගින් දක්වා තිබුණි. ඊක්වල් ග්‍රවුන්ඩ් ආයතනය රජයට ප්‍රශංසා කරන්නේ සියලු මිනිසුන්ගේ මානව අයිතිවාසිකම් ආරක්ෂණය සඳහා ගනුලැබූ ධනාත්මක පියවර සම්බන්ධයෙනි. විශේෂයෙන්ම අප සතුටුවන්නේ සංක්‍රාන්ති සමාජභාවීය හා සංක්‍රාන්ති ලිංගික ප්‍රජාවගේ මානව හිමිකම් ආරක්ෂා කිරීම සඳහා නව ව්‍යවස්ථා සම්පාදන යෝජනා මගින් මූලික අයිතිවාසිකම් පරිච්ඡේදයට ස්ත්‍රී පුරුෂ සමාජභාවය මත පදනම්ව වෙනස්කම් සිදුනොවිය යුතු බව දක්වා සිටීම සම්බන්ධයෙනි. ප්‍රතිපත්තිමය වශයෙන් මෙම තීරණය ශ්‍රී ලංකාවේ වාසය කරන සංක්‍රාන්ති ලිංගිකයන් හා සංක්‍රාන්ති සමාජභාවීය ප්‍රජාව සම්බන්ධයෙන් ඔවුන්ට එරෙහිව සිදුවන හිංසන හා මානව හිමිකම් කඩවීම් වැළැක්වීම සඳහා ආරම්භක පියවරක් වශයෙන් වැදගත්වේ.

එහෙත්, අවාසනාවකට මෙන් ශ්‍රී ලංකා රජය තම මානව අයිතිවාසිකම් ආරක්ෂා කිරීම හා ප්‍රවර්ධනය සඳහා වූ ජාතික ක්‍රියාකාරී සැලැස්ම සකස්කිරීමේදී ඔවුන් විසින් ජාත්‍යන්තර මානව හිමිකම් සමුළුවලදී ලබාදුන් පොරොන්දු හා ජාත්‍යන්තර වශයෙන් මානව හිමිකම් සංවිධානවලට ලබාදුන් වාර්තා යනාදියත්, ශ්‍රී ලංකාවේ මානව හිමිකම් සම්බන්ධව ජාත්‍යන්තර වශයෙන් යෝජනා කළ යෝජනාවන් යනාදිය සැලකිල්ලට ගෙන නැත. විශේෂයෙන් මානව හිමිකම් ආරක්ෂා කිරීම සම්බන්ධයෙන් වන එක්සත් ජාතින්ගේ කාල දර්ශක සමාලෝචනය (Universal Periodic Review of Sri Lanka – A/HRC/WG.6/28/LKA/1,Section IV:Ap7) සඳහා වන ශ්‍රී ලංකා වාර්තාවේ දක්වා ඇති ආකාරයට ශ්‍රී ලංකා රජය දණ්ඩනීති සංග්‍රහයෙහි එන ප්‍රසිද්ධියේ හෝ අප්‍රසිද්ධියේ තැනැත්තන් අතර සිදුවන බරපතල අශෝබන ක්‍රියා, අස්වාභාවික කාමුක සංසර්ගය වැනි නිසිලෙස අර්ථකථනය නොවූ විහිළු සහගත නීති වන 365 හා 365 අ වගන්ති ඉවත්කිරීමට හෝ වෙනස්කිරීමට අවශ්‍ය පියවර ගතයුතු බව යෝජනා වී තිබුණි. එමෙන්ම දණ්ඩනීති සංග්‍රහයේ එවැනි සංශෝධන මගින් ලිංගික දිශානතිය මත පදනම්ව සිදුවන වෙනස්කොට සැලකීම් තුරන්කිරීම සඳහා අවශ්‍ය පියවර ගතයුතුව තිබුණි. එහෙත් ශ්‍රී ලංකා රජය 2017-2021 වර්ෂ සඳහා තම මානව අයිතිවාසිකම් ආරක්ෂා කිරීම හා ප්‍රවර්ධනය සඳහා වූ ජාතික ක්‍රියාකාරී සැලැස්ම සකස්කිරීමේදී ව්‍යවස්ථාවේ මූලික අයිතිවාසිකම් පරිච්ඡේදයට ලිංගික දිශානතිය මත පදනම්ව සිදුවන වෙනස්කොට සැලකීම් වැළැක්වීම සඳහා වන යෝජනාව ඉදිරිපත් කිරීම මඟහැර ඇත.

එමෙන්ම2017-2021 වර්ෂ සඳහා වූ මානව අයිතිවාසිකම් ආරක්ෂා කිරීම හා ප්‍රවර්ධනය සඳහා වූ ජාතික -ක්‍රියාකාරී සැලැස්ම මගින් යෝජනා කර තිබෙන ආකාරයට ශ්‍රී ලංකාවේ ව්‍යවස්ථාවේ 3.1.2 කොටස මගින් පෞද්ගලිකත්වයට ඇති අයිතිය සම්බන්ධ වගන්ති වෙනස්කළ යුතු බව යෝජනා කර තිබුණි. විශේෂයෙන්ම ශ්‍රී ලංකාවේ දණ්ඩ නීති සංග්‍රහයේ 365 අ වගන්ති මගින් පෞද්ගලික ස්ථානයකදී සිදුවන සමරිසි ක්‍රියාකාරකම් ඔවුන්ගේ පෞද්ගලිකත්වය හා සම්බන්ධ කරුණක් වන නිසා පෞද්ගලිකත්වයට ඇති අයිතිය ව්‍යවස්ථාව මගින් තහවුරු කිරීමේදී ලිංගික දිශානතියද සලකනු ඇත්ද යන්න පිළිබඳ අපි සැක පළ කර සිටින්නෙමු.

මෙම ජාතික ක්‍රියාකාරී සැලැස්මේ 6.6.4 කොටසට අනුව සෞඛ්‍ය සේවාවන් ලබාදීමේදී ලිංගික දිශානතිය මත පදනම්ව වෙනස්කම් සිදුනොවිය යුතු බව දක්වා තිබේ. මෙමගින් පෙන්නුම් කරන්නේ අඩුම තරමින් රජය සෞඛ්‍ය සම්බන්ධ කරුණුවලදී හෝ ලිංගික දිශානතිය මත පදනම්ව සේවාලාභීන්ට කිසියම් හෝ ආකාරයකින් වෙනස්කම් සිදුවන බව අවබෝධ කරගෙන තිබෙන බවයි. එහෙත් මෙම වෙනස්කොට සැලකීම් පිළිබඳව අධීක්ෂණය කිරීම හෝ ඒවා පාලනය කිරීමට කිසිදු ආකාරයක ආයතනයක් හෝ නියාමනයක් ඉදිරිපත් කර නොතිබීම ගැටළුවකි. එම නිසා අප විසින් අවධාරණය කර සිටින්නේ ව්‍යවස්ථාවේ මුලික අයිතිවාසිකම් පරිච්ඡේදය මගින් ලිංගික දිශානතිය මත පදනම්ව සිදුවන වෙනස්කම් වැළැක්වීම සඳහා අවශ්‍ය යෝජනාව ඉදිරිපත් කරන තාක්කල් සෞඛ්‍ය ක්ෂේත්‍රයේ සිදුවන මානව හිමිකම් උල්ලංඝණය කිරීම් වැළැක්වෙන්නේ නොමැති බවයි.

ජනාධිපතිවරයා හා අග්‍රාමාත්‍යවරයා විශ්වාස කරන පරිදි මෙම මානව හිමිකම් අරක්ෂා කිරීම හා ප්‍රවර්ධනය කිරීම සඳහා වන වාර්තාව ශ්‍රී ලංකාවේ මානව හිමිකම් ආරක්ෂා කිරීම. ප්‍රවර්ධනය කිරීම හා සවිබල ගැන්වීම සම්බන්ධයෙන් වන ධනාත්මක හා ප්‍රගතිශීලී මුලපිරීමකි. එහෙත් මෙම වාර්තාවේ ප්‍රගතිශීලීභාවය පිළිබඳව ප්‍රශංසා කරන අතරතුරම අප විසින් කිව යුතුව ඇත්තේ ශ්‍රී ලංකා රජය එක්සත් ජාතින්ගේ මානව හිමිකම් සම්බන්ධ වන නිර්දේශ පිළිපැදීමට අපොහොසත්වී ඇති බවයි. සිවිල් සංවිධාන හා විවිධ සමාජ කණ්ඩායම් විසින් රජයෙන් ඉල්ලා සිටි සමහර ප්‍රතිසංස්කරණ ඉදිරිපත් කිරීමට රජය අපොහොසත් වී ඇති බවයි. ආර්ථික, සමාජයීය හා සංස්කෘතික අයිතිවාසිකම් සම්බන්ධ කමිටුව ඔවුන්ගේ 61වන සැසි සමාලෝචනයේදී දැක්වූ ආකාරයට (E/C.12/LKA/CO/5 Sec C:14 p4) ඔවුන් ශ්‍රී ලංකා රජයට නිර්දේශ කර සිටියේ “වෙනස්කොට සැලකීම් අවම කිරීම සඳහා ව්‍යවස්ථාවේ 12(2) වගන්ති පුළුල් කරමින් එයට ලිංගික දිශානතිය මත පදනම්ව වෙනස්කිරිම් සිදුනොවිය යුතු බව දක්වන ලෙසයි.”

මෙම සියලු අදහස් දැක්වීම් හා සාකච්ඡා මගින් පෙනී යන්නේ තවමත් ශ්‍රී ලංකා රජය ලිංගික දිශානතිය මත පදනම්ව සමාජයේ විවිධාකාරයෙන් හිරිහැරයට ලක්වන සුළුතර ලිංගික ප්‍රජාව ආරක්ෂා කිරීම හා ඔවුන්ගේ මානව හිමිකම් ආරක්ෂා කිරීම සම්බන්ධයෙන් සංවේදීභාවයක් ඇතිකරගෙන නොමැති බවයි. එහෙත් අප විශ්වාස කරන්නේ සමාජ ප්‍රගමනයට, රටේ සංවර්ධනයට හා ශ්‍රම බලකායට අයිති වන ඔවුන්ද අනෙක් මිනිසුන් හා සමානව සැලකුම් ලැබිය යුතු බවයි. නිදහසේ ජීවත්වීමට හා තමන් කැමති අයෙකුට ආදරය කිරීමට සමරිසි ප්‍රජාවට ඇති අයිතිය මෙන්ම වෙනස්කොට සැලකීමෙන් හෝ හිංසනයට ලක්වීමෙන් වැළකිමේ අයිතියද ඔවුන්ට ලැබිය යුතුය. වසර 134ක් පැරණි මුග්ධ නීතියකට යටත්වී ජීවත්වීමේ කාලය දැන්වත් අවසන්විය යුතුය. සමරිසි, ද්විරිසි, සංක්‍රාන්ති සමාජභාවීය, අන්තර් ලිංගික හා තම ලිංගික අනන්‍යතාවය ප්‍රශ්නභාවී ප්‍රජාවගෙන් (LGBTIQ) එක් කොටසකට හෝ සාධාරණය ඉටුකිරීමට මෙම ක්‍රියාකාරී සැලැස්ම මගින් රජය ඉදිරිපත්වීම පිළිබඳ අපි ප්‍රශංසා කරමු.

Continue reading this…

Find peace of mind: free counseling service for LGBTIQ persons

LEARN MORE

Zonta Women of Achievement 2017 - ශ්‍රී ලංකාවේ විවිධ ලිංගික අනන්‍යතා සහිත හා ස්ත්‍රී පුරුෂ සමාජභාවීය අනන්‍යතාවලින් යුතු ප්‍රජාව වෙනුවෙන් සිදුකළ දායකත්වය ඇගයීමේ සම්මානය.

ඊක්වල් ග්‍රවුන්ඩ් ආයතනය සාඩම්බරයෙන් යුතුව දැනුම්දෙන්නේ අපගේ විධායක අධ්‍යක්ෂිකා රොසෑනා ෆ්ලේමර් කල්දේරා මෙනෙවිය ශ්‍රී ලංකාවේ විවිධ ලිංගික අනන්‍යතා හා ස්ත්‍රී පුරුෂ සමාජභාවීය අනන්‍යතා සහාත ප්‍රජාව වෙනුවෙන් සිදුකරන කාර්යයන් වෙනුවෙන් සම්මානයෙන් පිදුම් ලැබූ බවයි. 2017 සැප්තැම්බර් මස 17 වැනි ඉරිදා දිනයේදී සිනමන් ග්‍රෑන්ඩ් හෝටලයේ පැවති කාන්තාවන්ගේ අභිවෘද්ධිය වෙනුවෙන් වන සොන්ටා (Zonta) සම්මාන උළෙලේදී මෙම සම්මානය ප්‍රදානය කෙරුණි. සොන්ටා එකමුතුව 1985 වර්ෂයේ සිට ශ්‍රී ලංකාවේ කාන්තාවන්ගේ අභිවෘද්ධිය වෙනුවෙන් සහ සමාජ සංවර්ධනය වෙනුවෙන් ඔවුන්ගේ දායකත්වය හා වටිනාකම ඇගයීමට ලක්කරන සංවිධානයකි.

තමන් ලබාගත් සම්මානය පිළිබඳව අදහස් දක්වමින් රොසෑනා ප්‍රකාශ කරන්නේ “මෙය මාගේ හෝ මා විසින් පසුගිය වසර 17ක් තිස්සේ විවිධ ලිංගික අනන්‍යතා සහිත ප්‍රජාව වෙනුවෙන් සිදුකළ කාර්යයන්ගේ ජයග්‍රහණයක් පමණක් නොව අප ප්‍රජාව සමාජය තුළ වැදගත් කොට්ඨාශයක් බව සමාජය විසින් හඳුනාගෙන ඇති බව මෙන්ම ආන්තීකරණයට ලක්වූ අනෙකුත් ප්‍රජාව මෙන්ම විවිධ ලිංගික අනන්‍යතා හා ස්ත්‍රී පුරුෂ සමාජභාවීය අනන්‍යතා සහිත ප්‍රජාවද සමාජය තුළ සුවිශේෂී වන බව හඳුනාගෙන ඇති බවට ලබාදුන් තක්සේරුවකි.”

අප විශ්වාස කරන්නේ රොසෑනා සහ ඊක්වල් ග්‍රවුන්ඩ් ආයතනය විසින් සිදුකරන කාර්යභාරය වර්තමානය වන විට සෙමින් සෙමින් වුවද සමාජගත වෙමින් පවතින බවයි. පසුගිය වසර දහයක පමණ කාලසීමාව සලකා බලත්දී පැවැති අභියෝග හා ප්‍රජාවේ අයගෙන් මෙන්ම සමාජයෙන්ද අපට එල්ලවූ අභියෝගවලට පිළිතුරක් මෙම සම්මානය මගින් සපයන බවයි. ව්‍යාපාර ක්ෂේත්‍රය, විවිධ රජයේ ආයතන හා සමාජ ආයතන දැන් දැන් සමරිසි, ද්විරිසි, සංක්‍රාන්ති සමාජභාවීය, අන්තර් ලිංගික හා තම අනන්‍යතාවය ප්‍රශ්නභාවී ප්‍රජාව පිළිගැනීම හා ඔවුන්ට සහයෝගය දැක්වීම වෙනුවෙන් අවශ්‍ය වෙනස්කම් සිදුකරමින් පැවතීම අප විසින් සිදුකළ කාර්යයන්වල සතුටුදායක ප්‍රතිඵල වේ.

තම සම්මානය ලබාගැනීමෙන් පසුව සමාජයට පණිවුඩයක් ලබාදෙමින් රොසෑනා පවසන්නේ “ඇය විසින් ලබාගත් මෙම සම්මානය කායිකව, වාචිකව, මානසික හා විවිධ ආකාරයෙන් හිංසාවට ලක්වූ වෙනස්කම්වලට ලක්වූ, සමාජය තුළ නොසලකා හැරීමට ලක්වූ මෙන්ම තම අනන්‍යතාවය වෙනුවෙන් අභීතව පෙළගැසුනු සියලුම සමරිසි, ද්විරිසි, සංක්‍රාන්ති සමාජභාවීය, අන්තර් ලිංගික හා තම අනන්‍යතාවය ප්‍රශ්නභාවී ප්‍රජාව පුද දෙන බවයි.. ඔබගේ මුළු ලෝකයම ගිණිගෙන ඇතැයි ඔබ විශ්වාස කරන විටදීත්, ඔබ තනිවී ඇතැයි ඔබට දැනෙන විටදීත් අවස්ථාවන් හා විකල්ප සෑම අවස්ථාවකදීම ලැබිය හැකිය බව විශ්වාස කරන්න. ඔබට මුහුණදීමට සිදුවන සෑම සිදුවීමකදීම ඔබ ක්‍රියාකරන ආකාරය වෙන කාගේවත් නොවේ. එය ඔබේමය. ඔබට එල්ලකරන සියලුම ගල් පහරවල් එකතුකරන්න. එක් එක් ගල එකතුකර ඒවායෙන් ඔබගේම මාලිගාවක් සාදාගන්න. ඊයේ දිනයේදී, අද දිනයේදී හා විවිධ ලිංගික අනන්‍යතා සහිතවූවන්ගේ අයිතිවාසිකම් දිනාගන්නා තෙක් අවසන් නොවන මාගේ සටනේ හෙට දිනයේදීත් මා කරන්නේ එයයි”.

Continue reading this…

2017 කොළඹ අභිමානී

ශ්‍රී ලංකාව තුළ වාර්ෂික අභිමානී සැමරුම පවත්වන එකම ආයතනය ඊක්වල් ග්‍රවුන්ඩ් ආයතනයයි – එය ශ්‍රී ලාංකික LGBTIQ ප්‍රජාවගේ දිනදර්ශකයේ ඉතා වැදගත් අවස්ථාවකි. ශ්‍රී ලාංකික LGBTIQ ප්‍රජාවට නැගී සිටීමට සහ ඔවුන්ගේ අනන්‍යතාවය පිලිබඳ ආඩම්බර වීමට ඉඩකඩ සහ අවස්ථාව ලබාදීමට ඊක්වල් ග්‍රවුන්ඩ් ආයතනය ඉතා වෙහෙස වී කටයුතු කරයි. ශ්‍රී ලංකාවේ අභිමානී සැමරුම තවමත් කුඩා පරිමාණයෙන් පැවැත්වෙන අතර, අපගේ අයිතීන් ඉල්ලා යම් දිනක වීදි පෙලපාලි යාමට බලාපොරොත්තුවක් ඇතත් වර්තමාන දේශපාලනික සහ LGBTIQ ප්‍රජාව පීඩාවට පත් කරන සුළු නීති නිසා එවැන්නක් කිරීමට තවමත් හැකියාවක් නොමැත. තවමත් අභිමානී සැමරුම පැවැත්වෙන්නේ පෞද්ගලිකව වන නමුත්, දිවයින පුරා විසිරී සිටින LGBTIQ පුද්ගලයින් සහභාගී වන තරමට එය පොදු උත්සවයකි. අභිමානී උත්සවය තව තවත් ශක්තිමත්ව ඇත. ප්‍රජා සාමාජිකයින්ට තමන් පිළිබඳව විවෘතවම ආඩම්බර වියහැකි ආකාරයේ විවිධ වූ වැඩසටහන් සෑම වසරකදීම පැවැත්වේ. විවිධත්වය පිළිබඳව පුර්ණ ලෙස සාකච්ඡා කරමින් LGBTIQ ප්‍රජාව දෙස වඩාත් අවබෝධාත්මකව බැලීමට අනුබල දීම අරමුණු කොටගත් අධ්‍යාපනික සහ සංවේදීකරණ වැඩසටහන්ද ඊට ඇතුලත්ය. මෙහිදී පැවැත්වෙන ඇතැම් වැඩසටහන් වනුයේ වැඩමුළු, නාට්‍ය/ සන්දර්ශන/ සංගීත වැඩසටහන්, චිත්‍රපට උළෙලවල්, චිත්‍ර හා ඡායාරූප ප්‍රදර්ශන, සාද සහ සරුංගල් සැණකෙලියයි.

මේ වසරේ ශ්‍රී ලංකාවේ විශාලතම අභිමානී උත්සවය වෙනුවෙන් සිත්ගනාසුළු අංග මාලාවක් සුදානම් කොට ඇත. සෑම වැඩසටහනක් සම්බන්ධයෙන්ම වැඩිදුර තොරතුරු සඳහා Colombo PRIDE ෆේස්බුක් පිටුව බලන්න. කොළඹ අභිමානී උළෙල යනු 2005 දී අභිමානී සාදයක් සමග ඇරඹු දකුණු ආසියාවේ පැරණිම අභිමානී සැමරුම්වලින් එකකි. 2006 දී, අංග රැසකින් යුත් ඉතා සාර්ථක වැඩසටහනක් සතියක් පුරාවට පවත්වනු ලැබුණි. එතැන් පටන් කොළඹ අභිමානී සැමරුම සහභාගීත්වයෙන් පමණක් නොව, විවිධ වූ අංගයන්ගෙන් පවා වඩ වඩාත් ශක්තිමත් විය. කොළඹ අභිමානී සැමරුමේ වඩාත් වැදගත් වූ අංගයක් වනුයේ LGBTIQ සිනමා උළෙලයි.

කලින් “දේදුනු සිනමා දැක්ම” ලෙස හැඳින්වුණු, දැන් අභිමානී ලෙසින් හැඳින්වෙන සිනමා උළෙල, යනු ශ්‍රී ලංකාවේ එකම ජාත්‍යන්තර සිනමා උළෙල මෙන්ම, දකුණු ආසියාවේ පැරණිතම LGBTIQ චිත්‍රපට උළෙලයි. සෑම වසරකදීම එය කොළඹ අභිමානයට සමගාමීව පැවැත්වෙන අතර දේශීය සහ ජාත්‍යන්තර LGBTIQ චිත්‍රපට ඉදිරිපත් කරනු ලබයි. ඊට කෙටි චිත්‍රපට මෙන්ම දීර්ඝ චිත්‍රපට ද ඇතුලත් වේ.
අපහට මහත් වූ සහයෝගයක් ලබාදෙන අනුග්‍රාහකයින්ට සහ සහකරුවන්ට අප ස්තුතිවන්ත වෙමු!
ප්‍රීතිමත් අභිමානී සැමරුමක් වේවා!

Continue reading this…

'134 මෙහෙයුමට'

වසර 134 ක් පුරා සාපරාධිකරණය !
වසර 134ක් පුරා කොන්කිරීම !
වසර 134ක් පුරා වෙනස්කොට සැලකීම හා පවිටු ලෙස අපගේ අයිතීන් උල්ලංඝණය කිරීම !

ඔබ එකඟ නම් අපගේ මෙහෙයුම හා සම්බන්ධවන්න බොහෝ ක්‍රම ඇත.

1. අපගේ මෙහෙයුමට ඔබගේ වටිනා අත්සන තබන්න

2. වීඩියෝ – රූපය බොහෝ දේ පවසන නිසා
3. අතරමැදි විශේෂ අවස්ථා – පුද්ගලයින් හමුවීමට , කතාබහ කිරීමට වැරදි අදහස් නිවැරදි කිරීමට
4. බැජ් සහ අත් පළඳනා වැනි දේ – ඔබ කැමතිනම් පළඳින්න
5. දන්නා දේ පවසන්න – අපගේ මෙහෙයුම වෙනුවෙන් යමක් කල හැකි අයෙක් සිටීනම් අප වෙත යොමු කරන්න.

මේ සම්බන්ධව ඔබ විශේෂ උත්සව/අවස්ථා සංවිධානය කරන්නට හෝ වීඩියෝ නිර්මාණ සාදන්නට බලාපොරොත්තු වෙනවා නම් EQUAL GROUND හි අපි හැකි උපරිම අයුරින් ඔබට සහාය වන්නෙමු.

ඔබ සංවිධානය කරනු ලබන විශේෂ වැඩසටහන් හෝ සාකච්ඡා වලදී බෙදා හැරීමට විශේෂයෙන් නිමවූ බැජ් හා අත් පළඳනා වර්ග ලබා දීමට අපට හැකියි.

අපගේ ෆේස් බුක් පිටුව අදහස් හුවමාරු කරගන්න හොඳ වේදිකාවක් වේවි. අප සමග එක් වන්න.

ෆේස් බුක් පිටුවේ ’134 මෙහෙයුමට’ දැක්වූ අදහස්, වීඩියෝ පටිගත කිරීම් හා විශේෂ අවස්ථා පිලිබඳ විස්තර අඩංගු වේ. ’134 මෙහෙයුමේ’ ඔබත් කොටස්කරුවෙක් වන්න.

Continue reading this…